علاج السواد حول الفم

علاج مشكلة السواد الفم
مشكلة النهاردة الي حابة اتكلم عنها هي
مشكلة محرجة جدا وبتعاني منها بنات ونساء كتير
الا هي ومشكلة السواد حول الفم
والاسباب لها متعددة اما انها صحية يعني داخلية
من ضمنها ارتفاع الاملاح في البول او نسبة الكوليسترول في الدم وفي بعض الاحيان نقص بعض الفيتامينات في الجسم او مشاكل في القولون والجهاز الهضمي.

ومن الاسباب الخارجية اللي بتسبب كده
هي طبعا معجون الاسنان واننا نسيبه يسيل خارج الفم وفي منطقة جوانب الفم بالذات
وكمان اكل بعض الفواكه والموالح منها خاصة و اننا نسيبها تنزل عصارتها حوالين الفم
واكيد طبعا استعمال انواع روج وتحديد رخيصة ومجهولة المصدر و ديه من الحاجات الخطيرة جدا لانها بتغمق لون الشفايف وكمان لما بتيجي تمسحي الروج ده بيسيب اثار خارج الفم ويبهدلها ويسبب السواد ده

علاج مشكلة السواد الفم
الحل بامر الله رب العالمين هيتكون من تلات خطوات:

الخطوة الاولي
هي
الوقاية
يعني تاخدي بالك من المسببات الطبية اللي قلنا عليها وكمان تعملي تحاليل كاملة وتعرضيها علي الاخصائيين وتشوفي العلاج المناسب لك ده اذا كان السبب عضوي ولما السبب العضوي يروح اكيد بامر الله وبالثقة في الله السواد ده هيروح هو كمان.
علاج مشكلة السواد الفم
الخطوة التانية:
العلاج
وده علي خطوتين:
خطوة العلاج الاولي:
هي الانتظام علي ماسكين اتنين فقط هتعمليهم بالتبادل اسبوعيا
يعني في الاسبوع مرتين ماسكات مرة من الماسك الاول ومرة من الماسك التاني.

الماسك الاول
عبارة عن عسل النحل الصافي مضاف له شوية زبادي وتدهني بيه المنطقة من تحت الفم لحد الدقن ولما ينشف تشطفيه كويس جدا بالميه بس من غير صابون عطري او اي شيء.

الماسك التاني:
عبارة عن النشا العادي بتاع المطبخ ده مضاف اليه ميه ورد(هي المفضلة طبعا وكل ماكانت طبيعية كل ماكانت النتيجة افضل)
او ميه عادية ولكن مغلية وتسيبها تبرد وتخلطيهم كويس جدا لحد ما يبقوا عجينة متماسكة وبنفس الطريقة افرديه ولما ينشف قشريه من علي المنطقة واشطفي بالميه بس.

خطوة العلاج التانية:
استعمال كريم طبي للتبييض

وهو طبيعي جدا مالوش اي اضرار

علاج مشكلة السواد الفم
الخطوة التالتة والاخيرة:

وفيها لازم ناخد بالنا من حاجات كتيرة قوي منها:

1- لما تخرجي في الشمس استعملي واقي شمس بدرجة مناسبة وادهنية في المنطقة ديه عشان ما تسمرش تاني او يتغير لونها مع التعرض للشمس.
وممكن كمان تستعملي زبدة كاكاو للشفايف بمعامل حماية من الشمس عشان الشفايف لونها ما يتغيرش هي كمان
(من شركة لابيلو علي سبيل المثال)
2- ممنوع استعمال بعض الوصفات العجيبة اللي بشوفها زي الفازلين والفكس
والا الفازلين والكركم
لان الفازلين ده من الاسباب اللي بتسمر المكان عند بعض الناس
وكمان الليمون ممنوع يستعمل
و الكريمات المعطرة بوجه عام ممنوعة تستعملي هي كمان خاصة لو خارجة بره وهتتعرضي برضه لشمس زي ما قلت فوق.

3- بلاش مستحضرات التجميل الرخيصة ومجهولة المصدر لانها بجد ضررها اكبر بكتير قوي من نفعها ده ان وجد لها نفع اصلا

دول تقريبا اللي فاكراهم دلوقت ولو افتكرت جديد هرجع ازوده
علاج مشكلة السواد الفم